الرئيسية » » أكتبني | فداء سلام

أكتبني | فداء سلام

Written By علي المضوني on السبت، 23 مارس 2019 | 8:03 ص

اكْتبْني
متل كاس الخمر
عَشفاف عاشق
يحرق ع حْفَافا جمر..
يحرق و ما يِطْفي
و تقلي
لعندك أنا رح فلْ..

اكْتبني
متل عطر الحبق
فرفط وراقو لمّا صَابِيعك
تمَشّط بشَعْرو ..
ظَل دخيلك
تَ يغفى.. دخيلك ظَلْ..

متل نهر الحنين بعروق الشجر
لمّا تقلّلي بحبك
تزَهّر ميّة لهفة و ألف طُلْ..

اكتبني
متل أرض لمّا القدر عليها يُمر
لمّا تجن العاصفة و تهرب مع الطوفان
و تغمر تلالي و الوادي و السهل

متل العشب لمّا تبوسو الشمس
بعد أول طلّه
و التلج ما قدِر يحبسو
لمّا موسم الحب هلْ..

متل تفاح ع أمّو كِبر
و الريح الولهانة من ضلوعك
جوا ضلوعي تلف
و يوَرّد ع خدودي الخجلْ..

خليني إلك القافية
و خفقة قلبي أجمل وزن
إنت البحر
و بنات فكرك موجاتو
مني ألف حملْ و حملْ..

اكتبني....

                                       فداء













التعليقات
0 التعليقات

0 comments:

إرسال تعليق

يتم التشغيل بواسطة Blogger.