الرئيسية » » شارب عداوة إسرائيل من صدر مصر بمعلقه | سعيد شحاتة

شارب عداوة إسرائيل من صدر مصر بمعلقه | سعيد شحاتة

Written By GPP LTE on الثلاثاء، 20 فبراير 2018 | 1:23 ص

مش فضفضه ولا تريقه
شارب عداوة إسرائيل من صدر مصر بمعلقه
ومصمم انّ الدمّ تار
وانّ النهار الجاي شايل قلبه جوّه الروح عيار
والضحك ويّا الندل عار والقاعده ويّاه مشنقه 
صفّوا الحقيقه المؤلمه في الدرنقه وغطّوا الشهيد
وقالولنا بكره الحلم هينبّت سما ف طمي الوريد
وانّ الشجر شايل جريد
والنخل طارح عيد وبنيّات حمام
وباعولنا أحلامنا الطيور ع السكّه ملفوفه ف كلام
خدنا الوجع في سرنجه والصمت ف لجام
وسرقنا صوتنا من السويقه ودوسنا ع الطين الحرام
وصرخنا للنصر المبين جوّه المقام
من غير ما نعرف مين مريد أو مين إمام
الأرض أرض المخلصين
والنصر للقلب الحزين
والفرحه للناس أجمعين
والدمّ حالف ميت يمين ع الانتقام
مش فضفضه ولا تريقه ولا ضحك خام
شارب عداوة إسرائيل من صدر مصر بمعلقه وكُرْه الحاخام
ومصمم انّ الدمّ مش طالب سلام
وانّ اللي بيبيع في المزاد
مش عارف الأسعار بكام ....................
ولا امتى طير الحبّ حام فوق العضام
ولا مين صبر على بلوته ف وسط النيام
وبكاها ضحك وهوّ بيموت م الألم علشان ينام
عام القمر ف الرمل عزّ الضهر من غير اختيار
عايمه الأغاني المحزنه فوق وشّها ف عزّ الحصار
هرب الربيع لاخضر وفات الاخضرار وسط المدار عانس
كانس عليم السرّ أسفلت الحياه بهدومه ومصلّي لشهيد الأرض
مش فضفضه ولا تريقه ولا سرد في الفاضي
شارب عداوة إسرائيل من صدر مصر بمعلقه وماضي ف طريقي شعار
ومصمم انّ الدمّ تار
وانّ النهار جاي بالغصون الخضرا ضلايه
وانّ الوطن للروح تُقى وآيه
وانّ اللي عاشها العمر بيدافع
هيموت متبّت قلبه ع الرايه
..............

التعليقات
0 التعليقات

0 comments:

إرسال تعليق

يتم التشغيل بواسطة Blogger.