الرئيسية » » رعب المواجهه | سعيد شحاتة

رعب المواجهه | سعيد شحاتة

Written By Gpp on الاثنين، 1 يناير 2018 | يناير 01, 2018

رعب المواجهه مع اللي جاي خلاني احسس ع الحياه
........... واتعلّم اسأل كلّ واحد مرّ من سكّتها يتعكّز
خلاني احط إيديا فوق كتفي بتأني شديد قوي
................... واضحك في وشّ الناس وانا مركّز
رعب المواجهه مع اللي فات 
علّمني اشيل روحي على دراعي اليمين
وامشي كأني اتنين بيستنوا السما تطرح
قلبين من الخوف والشتا دايخين على مطرح
بتزقني أوجاعي بالعافيه ف طريق فاضي
لكنّي راضي وماشي بالأوهام على المسرح
باضحك على كسر الإيهام وأرسطو وبرانديللو والأراجوز
الرعب من كل اللي انا شفته
............. خلّاني ماشي اضحك وضارب بوز
وشّين عيونهم دستتين مش جوز
.......... لكنهم شايفين سباط الموز طشاش
كلّ اللي شافني منّهم طمن قرايبي وقال لهم: عدّت وعاش
صلّى الجميع فوق البلاط وباسوني في جبيني بثبات قائد ما جاش
....... وقالولي ربّك جاب وربّك وحده حاش
الدنيا دايمًا عايزه أوقات الفَرَح حبّة حباش
قلبي اللي باش م الحزن كان عايز يقف...
.... بس الهزيمه اللي ابتدت تطرح شجر قالت: بلاش
رعب المواجهه من الحاجات خلاني احسس ع الحياه وكأنّها حتّة قماش
.......................

التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.

Follow by Email

Google ads